الرئيسية / قصص غريبة / قصة بعنوان … أحببت نجماً لامعاً …. الجزء الرابع

قصة بعنوان … أحببت نجماً لامعاً …. الجزء الرابع

 

ضربت العياقة على الصحافيين معلوم و أنا اللي فايزة بحوار مع بدر باقي عايشة نجاح ضربة المعلم كلشي ولا كيغير مني و رجاء مسكينة مهمومة ماحيلتها للخدمة اللي معكسة ليها و حبيبها الودادي هاذ الدرية ماعندها زهر بان ليا البلان فإخلاص شحال متصنعة و كتكلف إخلاص نوبتك كنقلب ليها على شي خبر ساعة هاذ البنت كلها تافهة شغانعطيو للناس الحموضة براكة غير حموضة زملائي فالمجلة واحد كاتب خبر عليها ” يبدو أن إخلاص معجبة بالنجم بدر فببادرة منها إخلاص أبدت إعجابها بصورة بدر على الفايسبوك و علقت عليها ” و الله يعطيك المسخ نتا و أخبارك اللي دار جيم لشي واحد راه كيبغيه ولكن من نهار interview مع بدر ماكتبت شي خبر اللهم نقضي بتفاهات إخلاص ” إخلاص عاشقة السيلفي أكثر من 100 صورة يوميا ” اللهم هاذ الخبر ولا بلاش دايرة فيها أنجيلينا جولي و تواضعي معانا كتبان ليا رجاء جايا و تلاقات مع سعيد حظها سهات فيه كانت غتعكل و طيح و هو شدها لقطة رائعة بحال داكشي ديال الأفلام رجاء تزمكات و حشمات و سعيد كيسولها كيبقات و أنا كنتفرج فيهوم بالنسبة ليا مشاهدة قصة حب حية و قدام عينيك كتعطيني متعة كبيرة تقول أنا اللي عايشاها==>كتفرجي و عاجبك الحال أنا غنهجرو ليك مزال مابغات تسرط ليا قضية الحوار اللي دارت ليا هاذ نيمار هاذي ولكن ماتصورتهاش بهاذ الوقاحة أنا غندمها على النهار اللي حطات فيه رجليها فبيتي مشيت كنقلب عليها والو مابانتش : سمحيليا ـ النجم المتميز بدر هذا عرفتي أنا من أشد المعجبين بيك ـ شكرا عفاك نتي خدامة فجريدة ” scoop ” ـ وي الفنان ديالنا ـ معرفتيش فين ممكن نلقى … نيمار ـ ويلي ا الفنان نتا كاع هذا زهر عندنا الحاج نيمار يجي لجريدتنا الحاج نيمار ؟؟؟ هاذ الجريدة مخدمة غير المسرفقين مال هاذ الناس : ختي أشمن الحاج نيمار علامن كتهضري ـ هذاك اللاعب اللي كلعب الكرة ـ حاج هذاك ختي أنا كنهضر ليك على ذيك الصحفية اللي دارت معايا interview ـ ميار غتلقاها غير مجلية فشي قنت كتقلب على شي خبار قولي كتهجم على شي واحد باش دير شي حوار من ذوك حواراتها هزيت تيليفوني لقيتها آخر خبر حطاتو هو واحد التصويرة ديال إخلاص صافي عرفتها فين كاينة مشيت و كتبان ليا واقفة غير شوفتها كطلع ليا الضغط : أيتها الصحفية الفاشلة مرحبا ـ هاذي هي السلام ديالك ـ لا ماشي لسانك فقط اللي طويل بل حتى يديك ـ أش كتخربق ؟ ـ كنخربق طلعي الساعة ـ الساعة ؟ على أشمن ساعة كتهضر ـ ماعارفاش الساعة ديالي اللي شفرتي منين دخلتي لبيتي ـ الله يخليك مانسمحش ليك تعايرني أنا ماديت ليك لا ساعة لا والو ـ فين مشات يلاه منين حطيتي رجلك فالبيت ماعاودات بانت ـ كون تلفات ليك و لا سرقها ليك شي حد آخر ـ شوفي راني نقتل روح على ذيك الساعة و دابا غطلعيها ولا نطلع ختي حتى للسما و نخبط بيه اختاري ـ اهياناري اللي شافكم فالتلفزة يقول هنا نبات أنا ماشفت لا ساعة لا غيرها و سير قلب على ساعتك و بعد مني وراك ماختعلنيش سمعتيني و هاذ الحركات سير ديرهوم على شي بوبية ميار هاذي و أجرك على الله ـ هذيك البليدة الحقيرة طلعي الساعة ـ الأخ هو اللي كيترجم لكمال فسامحيني براكة من هاذ الألفاظ ديال الويل و خليتو و زدت و الله حتى قاليك ديت ليه الساعة زوينة هاذي بنادم غير كيلوح الباطل مع أنا بدر عزيز عليا مور هادشي و ليت نحماق عليه هزيت تيليفوني نشوف جديد الصحافة أويلي واش هذا حماق أش هادشي كاتب ” النجم المغربي بدر يفقد ساعته مباشرة بعد مقابلته مع الصحفية ميار ” فضيحة هاذي هاذ الصحفي كنعرفو صاحب بدر أكيد هو اللي قاليه ينشر الخبر مصيبة مالي كنقفف بغا الحرب هاهو غيشوف ” بعد مقابلتي مع النجم بدر تعرضت لكافة أشكال الإهانة من ضرب و شتم و سب و آخر الأخبار أصبح يتهمني بالسرقة ” جمع صرفك ميار هاذي لعب بعيد هاذ المرة و أنا غادا كيبان ليا الممثل أيمن واقف و مجمع مع إخلاص خبر زين هاذي ” ما الذي يحدث بين النجمين أيمن و إخلاص خاصة بعد إشاعة قصة حب بينها و بين بطل فيلمها الأخير بدر ” نهار زين هذا مكرهتش نشوف ردة فعل بدر مور هاذ الخبر و البنت اللي كيبغي واقفة مع وحد آخر==> ردة فعلي واش هاذي بغات تحمقني أش هادشي كاتبة أنا ضربنتها أنا عايرتها لا مافيهاش هاذي مجنونة رسمي و لا بغات تجنني : بدر ياك لاباس ـ قرا شوف هاذ المصيبة أش كاتبة ثاني عينها فيا ـ ناشرة خبر على إخلاص و أيمن ياكمة غرتي ـ أشمن إخلاص ثاني قرا الفوق ا سعيد ـ ضربتيها ؟؟؟ حشومة عليك و الله ماشي لهاذ الدرجة ـ راه كذابة هذيك فين ضربتها ـ زعمة غير جات و كتبات ـ و ماشي شي ضرب الصراحة ـ ماماتش غير خرجو ليه مسارنو ضرب ضرب ـ هي اللي عصباتني ـ وزايدها كتهمها بالسرقة ـ لا هاذي دارتها هي مولات الفعلة ـ شفتيها ـ باينة الساعة غبرات من نهار حطات رجليها هنا ـ والله حتى حشومة عليك و نتي فضيحتيها فالمغرب كامل خاصك تخرج باعتذار ـ مالها باش جاتها ـ قرا اشنو كاتبين عليك الناس خديت التي التيليفون و كنقرا تعاليق الناس ” زاد فيه على مكانة منوض الحيحة ” ” ماعندوش الحق يضربها ” ” هذا حال صحافة مساكن وسط تعجرف الممثلين ديالنا ” هاذ الناس يشكروك و فلحظة يعيبوك كيبان ليا قفرتها زعمة ماكاينش شي حد جا من جيهتي طبعا الفانز عمرهم يتخلاو عليك ” بدر ماديهاش فهضرة الناس هذيك غير ضريبة الشهرة راك طوب ” ” هذيك أصلا ماصحفية ما حتى وزة و هذيك مجلة تافهة بدر نتا ديما فالصف الأول و لو كره الكارهون ” و تعاليق من هاذ القبيل : خاصك تعتاذر ـ لا ضروري ناس تهضر ولكن هادشي ماكيغير والو ـ بدر ـ سعيد صافي سد الموضوع أنا قلت الحقيقة واش كذبت عليها هي شفراتني ==>هذا شفتو داغي لبس ليا تهمة السرقة أشمن سرقة الله يهديه فثانية تحولت من صحفية محترمة لسارقة و عندي السوابق و هاذ الناس شحال كيتيقو دغيا ردوني شفارة ماخصهومش اللي … أنا أش كنقول هاذي راه خدمتي كيفاش مايتيقوش اللي تكتب واش غنخدم أنا نبيع الزريعة مكنتش كيسحاب ليا نهار غنطيح ضحية الصحافة أنا وليت شفارة لصقات فيا التهمة ولا كولشي كيخاف مني فهاذ المهرجان لا ندي ليه شي حاجة أواااه حتى هاذ الدرجة ممكن الإعلام يأثر المديرة تاصلات بيا صبناتني : ميار فآخر أيامي صحفية من مجلة ديالي دير هاذ الفضيحة ـ غير سمعي ليا امدام ـ ماكاين مانسمع اويلي خاصك ساعة علميني نجيبها ليك ماتشفريهاش غير بلاتي حتى ترجعي خبار يجيبوه اللخرين دابا عاد عرفت شكون اللي سرق ذاك البراصلي ديالي منين تجي جيبيه معك ـ مدام ماديت و الو و اللله حتى بريئة ميمتي قفرتها خويا كيسيفط ليا مسجات ولا كيسميني غير السارقة الصغيرة ذيك 200 درهم غطلعيها دابا إلا 200 درهم و شحال من تهمة و جريمة قديمة وقعات فالدار تحملت أنا مسؤوليتها رجاء ولات خايفة على حوايجها أول مرة تسد الماريو ديالها : ميار واحد القميجة شحال مابانت ليا عفاك إلا خديتيها رديها ليا حتى هذيك قميجة نطمع فيها كلها كشفات بالصابون ماما حتى هيا بلاصة ماتجي من جيهتي دخلات معاهوم : ميار بنتي أخيرااا عرفت شكون كان كيسرق ليا الحلوة من السطل هذا نتي يافار الدقيق ماشي أنا لا بلاتي هاذ الجريمة أنا اللي درتها كلشي ولا كيشك فيا أي واحد كندوز من حداها كيقلب جيبو لا نكون هزيت ليه شي حاجة (ميار عفاك اختي مابانش ليك clavier ديالي ـ حتى نتي يا ليلى قلت باللي نتي متيقاني حينت شاهدة ـ الله لا يطيح علينا شي بطل شاهدة علاياش أنا محايدة و نتي كلشي متهمك عفاك ردي ليا clavier باغا نكمل الكتابة ـ سيري بعدي مني مانفعة فوالو حتى نتي منهم ـ زايداها بالغواث يالشفارة شوفي راه منين غنحط هاذ القصة غنسول واحد بواحد من القراء لا تكون مشات ليه شي حاجة ـ غبري) كلشي شاك فيا و نتوما حكمو واش فاش دخلت لبيت بدر ديت شي ساعة و ماتكونوش منهم حتى نتوما سيرتي على كل لسان ميار السارقة و راني صحفية نتا السبب نتا ياهاذ الممثل الفاشل==> حدك تما فاشل اللهم نكون فاشل ولا سارق زايداها بتخراج العينين يوم جديد فالمهرجان بدا بلقاء صحفي هاذ المرة خاص بالفنانين المنافسين فالدورة بحكمي أني من لجنة التحكيم جالس مع الحضور و هاذ الإدارة عزيز عليها تخلق الفتنة ماجابو حدايا غير نيمار عزيز عليهوم شي حاجة سميتها buzz نيمار حتى هي ماطلعات حتى هضرة تقول جالسة على قلبي الله يستر خنقاتني كنشوفها كنتفكر ساعتي مكرهتش نقتلها كتفقصني هي و سميتها و أنا ريالي حتى النخاع و جالس حدايا نيمار==> نيمار سميتي ميار الجاهل أش كتعرف نتا لشي أسماء هاذ الصحافة غير حاضيانة لا نوضو شي مضابزة درت عقلي و كنحاول نتهدن و مانديرش شي مصيبة بدا أيمن المقابلة الصحفية بخصوص الفيلم ديالو وهاذ خينا لي حدايا غير كيكنش فواحد الكتاب إدارة فاشلة كيفاش تخلي أمي بحال هاذا ماقادر حتى ينطق كلمة صحيحة فلجنة تحكيم أيمن كيجاوب على أسئلة الصحفيين سولوه على الفيلم و القصة ديالو و تجربة الإخراج اللي خاضها أيمن لأول مرة شوية دخلو معاه للسخون و واحد الصحفية من الطرف : شنو رأيك فالفيلم الأخير ” الزين اللي فيك ” و بعض اللقطات المسربة و اللي كانت مخلة بالحياء ـ أولا أنا مزال ماشفت الفيلم باش نحكم عليه شفت غير شي لقطات يقدر الفيلم يكون كيهضر على واحد الواقع اللي حنا كنحاولو نغطيوه منين نشوف الفيلم ذيك الساعة غنقدر نعطيك رأيي صدمني بجوابو هاذ أيمن كان عزيز عليا واش القيلم شوهنا فالعالم وهو كيقولو مانحكموش عليه حتى نشوفوه براكة غير داكشي اللي شفنا : مانحكموش على الفيلم حتى نشوفوه هاذا راه بغى يشوف لبنى أبيضار ماعينو ففيلم فكرت بصوت مرتفع بدر سمعني و بقا كيضحك : الناس تفرجو و عارفة أش كاين فالفيلم و لقطات ديال أبيضار ـ لا نتي زين زعمة ماتفرجتيش باش عرفتيني علاش كنهضر يلاه ـ أنا فمجال السينما و خاصني نكون على علم بكلشي ـ حتى أنا فمجال السينما العياقة الخاوية ـ أنا فيا العياقة وسنطيحة مع راسك أصلا نتا غير دري بحالي بحالك علاش غتحشمي مني أصلا ـ إوا قلاليتو يا رجال اللهم نعاونوكم شوية و ناخذو دوركوم باش نقادو المجتمع ـ بزاف عليك تقولي هاكا مالي بنتليك ماشي راجل ـ كيقوليك واحد المثل إنجليزي ” الرجل الحقيقي لا يرتدي اللون الزهري ” و أنا كنشوف حدايا جردة تبارك الله ديال الورود ـ مال اللون الوردي جا معايا حسن منك يا نيمار ـ اييه يا painter ـ وي painter و عمري بيها فمك ـ pink painter  كنتسنى غير فوقاش يسالي هاذ اللقاء مابقيتش قادرة نزيد دقيقة وحدة حدا بدر كتبان ليا نظرات بين رجاء و سعيد ثنائي جميل جاو مع بعضياتهوم سعداتها محظوظة واخا حتى وحدة فينا ماطلعات بشي مقال من هاذ اللقاء على الأقل رجاء لقات نصفها الآخر إمتى نوبتي حتى أنا قلبي الصغير لا يتحمل فين هو سعدي و ميموني أجي ندير الفال و ندور اللي طاحت عليا عليه عيني هذاك هو سعدي غمضت عيني و درت 1 2 3 بسم الله الرحمان الرحيم تفو على فال كيداير أش كيدير هذاك تما وزعمة بلعاني درت لليمين حينت كان فاليسار باش مايطيحش فيه فالي ساعة ماجات عيني غير فيه ممثل فاشل صافي اللهم نبقى بايرة حسن ليا و لا زماني يكون بدر خليني غير حدا ميمتي==> و أنا إلا كنت غنتزوج وحدة بحالك مامزوجش الالة من بعد ماحكمو عليا الكفرة بالله نجلس حدا هذيك 45 دقيقة كاملة أخيرا تحررت خرجت من القاعة اللي كان فيها اللقاء وقعات لبعض المعجبين و خذيت معاهم سيلفي خصوصا مع الجنس اللطيف أحسن حاجة فالتمثيل و الفن هوما المعجبين و بالأخص المعجبات شعور جميل تلقى ناس كيبغيوك و كيساندوك ناس اللي كتقدم ليهوم أعمال تعجبهم و هوما يقدرو العمل ديالك و يعطيو رأيهم (سمعتو ياللي كيقرا القصة ويهرب لا جيم لا كومونتير ) و أنا معروف عليا كنبغي الفانز ديالي و كنعطيهوم وقت راه هوما الربح و راس المال و من غيرهوم لا وجود لنا و على الطريقة الديكارتية ” أنا عندي فانز إذن أنا موجود ” شكون هاذي اللي جايا من المعجبات لا هاذي راه المعجبات كاملين شكون طالق البقر هنا ميمتي لابسة T-shirt فيه سميتي كتعيط بسميتي ” بدر راك واعر ” بدر راك واعر بدر الله يرحمك كنت ممثل واعر هاذي هي العبارة الصحيحة ماكاين حد هاذي غتاكلني ناري قاصداني نيشان و كتجري تسونامي جاي الأوطيل غيريب واش لحتى هاذ الدرجة كانت المعيشة رخيصة فبلادكم أنا مع غلاء الأسعار أنا مكرهتش يردو الخبزة ب 100 درهم الرشاقة الرشاقة ديرو شوية الريجيم تفرجو شوية فالتفاح الأخضر و تبعو النصائح و لا غير كولو التفاح باش تهضمو ميمتي قربات خاصني نفلت بجلدي علقت و شديتها بجرية ماتلفتش مورايا ==>هههههههههههههه مكرهتش كون غير كنت و نشوف بدر كيجري و موراه la vache qui rit فرصة لا تعوض : ميار حبيبة بغيت نطلبك واحد الطلب ـ ياك لاباس ا رجاء ـ الزين ديالي ياأحسن صحفية فالوجود ـ رجاء خففي ـ ميار نسيت تيليفوني فالبيت ممكن تجيبه ليا ـ سيري جيبيه لراسك ويلي منقشة ـ راه قلبي اللي تنقش فيه سمية ديال سعيد عفاك ا ميار بغيت نخلي حبيبي قدام عيني حسي بختك أمري لله خرجت من القاعة باش نجيب ليها تيليفونها من البيت و هي بقات مجمعة مع سعيد غادا غير بزز و كنكر شي يبغي و شي يضرب تمارة هذا سعد اللي ماعندو سعد بحالي ياربي حتى أنا لاقيني بشي واحد يملي عليا الفراغ فاش عايشة و أنا غادا كنتزادح مع شي حد يلاه غنهضر سد ليا فمي بيديه هبط ليا راسي و تخبينا مور واحد الشجر وجمع يدك يالباسل بدر تالف و كيهضر غير بشوية و كيتلفت أمالك ياك لاباس ـ شششش سكتي ماخاص حتى واحد يشوفني ـ مالك كتهضر بشوية سارق ـ لا السرقة نتي مولاتها ـ ياك و هنا طلعت نبرة صوتي وسمع ياسيدي بدر زير يدو على فمي حتى كنت غنتخنق كتبان ليا واحد البنت تبارك الله هيفاء وهبي المغربية بحجمها السابق قرب بدر مني باش مانبانوش لدرجة كنسمع دقات قلبو و أنفاسو على وجهي شي حاجة فيا لداخل تحركات وهو عاطيني جنب و كيشوف الوضع واش آمن أما أنا سارحة فكل حاجة فيه شعرو عينيه لحيتو اللي كانت مرتبة جسمو الرياضي كان وسيم وهو مركز فشي حاجة أنا بضيع ياوديع مالي أش جرا ليا : ياربي ماتشوفنيش بقيت كنتمتم و قريب روحي طلع ماشي حينت خنقني ولكن قربوكيشكل ليا الخطر وهنا بدر رخف عليا و بعد شوية و أنا كنحس براسي عاد تنفست : سمحيليا ـ واش حماقيتي كنت غتخنقني ـ راه أنا اللي كنت غنتخنق كون شافتني هاذي وهي كتبان ليا مستقبلاني بالأحضان ـ شكون ـ هاذ البنت من الفانز غير هربت ليها و صافي وهنا تحولت من ميار العاشقة لنيمار الشريرة أنا نيمار أنا شفارة أنا غنوريك ميار علاش قادا وهو مشغول كيراقب البنت أنا هزيت عرفتو شنو هزيت أكيد شكون من غيرو هاتفي صورت البنت و لأني حافضة كتبت فclavier اللي غيتكتب صورت بدر و publier مشات البنت بدر تلفت لقاني هازا تيليفوني و ضحكة شريرة : أش درتي ثاني ياهاذ الصحفية الفاشلة ـ مادرت والو درت غير خدمتي و صافي وزدت و خليتو غادي يطرطق ==>أش دارت ثاني هاذ البنت هزيت تيليفوني و كلي كنترعد ” بدر يهرب من ملاحقات إحدى معجباته إنه شخص متناقض بكل معنى الكلمة ” متناقض نيمار نيماااار نيماااااااااااااااااااااااااااااار باغا تسطيني واش مسلطها عليا شي واحد شنو كتبو الناس ” والله حتى حرام عليه صافي غير حينت مسكينة غليظة هرب منها ” مسكينة كاين شي مسكين قدي ” طلعنا ليهوم الشان و هادشي باش كيجازيونا ” قفرتها نتي السبب والله مانخليها فيك كنكرهك قد كرهي للبارصا و كثر غير بلاتي أنا غنوريك الضحك و اللعب الباسل : ألو خويا الزين سافا شحال ماكتبتي شي خبار غبرتي مهم سمع عندي ليك خبر بميكتو و عجبني نبغي اليوم تنشرو و فالصفحة الأولى و اللي بغيتيها تحضر هاذي غتجيب ليك تمام ا بنتي يانيمار نشوفو واش الهجوم دياللك غينفعك فرحانة بخبري اللي ولا فكل لسان المديرة عجبها الحال و أنا ماعجبنيش الحال ماشي هاذي هي الخدمة اللي كنت كنتمناها ماشي بحال هاذ الأخبار باغا نقدم باغا شي حاجة موراها هدف قضية موراها مغزى و كتوعي الناس ماشي هاذ الإعلام اللي كنت كنتمنى و اللي تافه بحال الأفلام ديالنا حتى حاجة مابقات عندها معنى أفلامنا خاوية و إعلامنا قاليها ماشفتي والو ولكن علاش اليوم كنقول هاذ الهضرة 3 سنين و أنا خدامة فنفس الخدمة و فنفس الظروف أخبار تافهة وحامضة اليوم شي حاجة تغيرات صورة بدر وهو قدامي مابغاتش تفارق بالي لا هو راه العدو ديالي مايمكنش نفكر فيه ميار ديما كنت قوية مالك اليوم نسيتي التحدي بيناتكم  وصل التيليفون بكري ـ سمحيليا ا رجاء كان عندي سبق صحفي ـ شفتك يالساطا محيحة منين جبتي ذاك الخبر ودار buzz اصاحبتي ـ راه قلتليك الصحفي لا يكشف عن مصادره ـ أجي نشوفو الصحافة أش كاتبة ميار تشهرتي يالساطا وراك فالصفحة الأولى ـ أوااه لحتى هاذ الدرجة أخباري مهمة أري نشوف أش هادشي قدامي اويلي فضيحة ” الصحفية ميار و لا حديث لها غير الممثل بدر هل هو اهتمام أم حب ” أشمن حب ناري ولد الحرام ناشرها فأكثر جريدة متابعة فالمغرب سيرتي على كل لسان و حتى الناس اللي بانو ليا غيساندوني و يوقفو معايا هوما أول ناس عطاوني الضهر زملائي فالجريدة بلاصة مايدعموني هوما كيزيدو فنشر الخبر والمديرة عاجبها الحال رجاء بقات كتشوف فيا : ميار ياك أنا صاحبتك ـ معلموم ـ نتي تشوهتي تشوهتي و أنا شحال ماخدمت و حينت أنا صاحبتك خليني ننشر خبر كنهضر فيه على مدى حبك لبدر واش هاذي حمقة ولا هبيلة ولا شنو واش باغا تسيفطني : نتي أش كتقولي تشهري على ضهري و الغدر هذا ماشي حشومة عليك ـ ميار ـ بعدي مني صحبة ديال والو خرجت صاعرة و كلشي كيشوف فيا وصلت للقاعة اللي غيبدا فيها واحد اللقاء لقيت بدر مستقبلني بالابتسامة زدت كرهت راسي ماشي على ود الخبر و إينما حينت وسط كاع هادشي اللي دار فيا ماقدرتش نحقد عليه و قلبي ضرب بطريقة جنونية منين شافو ضحكتو شحال زوينة وقفتو و إطلالتو ساحرة يقدر يكون داكشي اللي كتب بصح وصلت حداه تجاهلتو زدت و كملت طريقو شد ليا يدي و عارض طريقي : مال نيمار ميك علينا و براكة ماتخبي كشفاتك الصحافة ـ نتا عارف و أنا عارفة باللي هادشي كذوب ماشي حشومة عليك كتنشر الأخبار كاذبة ـ نتوما زعمة ملائكة بقى فيك الحال ماعمرك فكرتي واقيلة فهادشي منين كنتشريه على ناس آخرين راه كلنا بشر و كلنا عندنا نفس الإحساس الإحساس اللي كتحسي بيه دابا هو باش كنحسو منين شي واحد كينشر علينا إشاعات الفرق أنك أول مرة تحسي بيه و حنا ولفنا بيه طلق ليا من يدي وزاد و خلاني عندو الحق حنا ديما كنشرو الأكاذيب على الناس عرفتو ذاك الإحساس فاش مكتكونش داير شي حاجة و كلشي كيشوف فيك شوفة ناقصة من سارقة وليت بنت كطيح من قيكتها باش توصل لشخص كتبغيه ماغنخليهاش فيك يا بدر فيدي كانت الورقة الرابحة فيديو للأب ديالو وهو كيسخط عليه علانية اليوم نستاغلو هذا فيديو قديم طاح من بين يدي ” أنا آخر شخص نتغرم بيه بدر شخص اللي الأب ديالو ساخط عليه ” حطيت الفيديو و بوبلييت الخبر ولكن المفاجئة أن الخبر ماتحطش المديرة مزال عايشة على البوم اللي دار خبر اعجابي ببدر أش هاذ الزهر==> نيمار يا نيمار واااو على لقطة فاش شفتك مقلقة منين سمعتي هاذ الخبر عجبني الحاااال مشيت ندوش منين خرجت كنلقى سعيد كيخنزر فيا : صافي تهنيتي وصلتي لغرضك ـ هي اللي بدات ا سعيد ـ ها ساعتك اللي فاضحنا بيها ـ عطاتها ليك ـ بدر راه الساعة كانت غير مجلية فالغرفة هزيت الساعة و بقى فيا الحال حينت تاهمتها ضميري أنبني و ماحملتش راسي خاصني نصلح خطأي  بقيت مقلق و طالع ليا الدم ماعجبنيش الحال بقيت كنقلب على نيمار باش نعتاذر منها مالقيتهاش بانت ليا غير صاحبتها مشيت باش نصولها عليها : سمحيليا ـ أهلا بدر ـ بغيت نسولك على صاحبتك مابانتش ليك ـ كاينة فالجردة ديال الأوطيل ـ شكرا خرجت نقلب عليها و أنا كنلوم راسي على تسرعي بانت ليا جالسة و مقلقة رديتها سارقة و كتبغيني وهي مادارت والو من غير خدمتها فعلا زادت فيه و لكن كتبقى هاذي هي الخدمة باش عايشة : مالكي ياكمة البارصا خسرات شافت فيا بعيني فيهوم الحزن بقات فيا بغيت نلطف الجو مالكي كتشوفي فيا وراه الريال محيحة عليكوم هاذ العام بغات تنوض شديت ليها يديها : عفاك بغيت نهضر معك ـ أش بغيتي ؟ ـ بغيت نعتاذر على كل سوء درت ليك ـ اعتذارك مرفوض ـ عفاك ندير اللي بغيتي غير سمحي ليا ـ تخرج بلقاء تكذب فيه هادشي كامل ـ مانلقاش حسن منك بداي مقابلة و أنا نشرح فيه هادشي كامل و نيت باش ماتخسريش خدمتك ==>بدر هذا سبحان مبدل الأحوال استاغليت الموقف و رديتو لصالحي صافي هاذي فرصتي : موافقة يلاه نبداو الحوار غادي نسجل الهضرة و نردها مقال ـ على بركة الله ـ السلام و عليكم بدر أول سؤال شحال من كارو كتكمي فالنهار ـ واش نتي حمقة باغا تنقذي خدمتك و تخرجي عليا ـ ماعرفتش راه تالفة ماعرفت مانكتب ـ كتوقع فأحسن العائلات غير تهدني خوذي نفس و أنا غنعاونك ـ شكرا و هنا غنبدا حوار مع بدر اللي غيغير نظرتي ليه و نتعرف على بدر جديد : أولا كنبغي نشكرك على الحوار و نتمنى نكونو خفاف الظل على القراء ـ الشكر ليك و مرحبا بيا عندكم ـ بدر بغيت نبدا معك من الأول و نهضرو على بداياتك بدر كيفاش حتى ختار التمثيل ـ هاذ السؤال ديما كيتطرح عليا أنا ماعمرني كنت نتخيل شي نهار غنكون ممثل أنا ماعمري قريت السينما و لا الفن قريت شوية المسرح و شاركت فبعض العروض و لكن إلى قسم ليك الله شي حاجة غتوصليها ـ النهار الأول فاش مثلتي كنت كتوقع غتوصل لهاذ الشهرة ـ كان عندي حلم و هدف و الحمد لله بحب الجمهور وصلت ـ شنو هو الدور اللي يمكن تكون ندمتي عليه ـ لحد الآن الصراحة ماعمرني ندمت على شي دور أي نعم كاين شي أدوار مون تعرضات عليا دابا مانوافقش عليها حينت ماعطات حتى شي إضافة و لكن الدور اللي ندم عليه و مكرهتش نحيدو من سجلي لا ماكينش أغلب الفنانة كيطيحو فهاذ المشكل فالبدايات الحمد له بدايتي كانت صحيحة ـ كنشوفوك بزاف فالأعمال العربية و لكن سبب غيابك من هاذ الأعمال فرمضان وهو موسم الذروة ـ لأن أغلب الأعمال اللي كتقدم ليا ماكتحتارمش قدسية الشهر الكريم و بعض المشاهد و بعض الفنانة مايصلاحوش يكونو فرمضان إلى كنا غنقدمو أعمال بحال هذيك و يتفرجو فيها ناس غير بلا مانصومو حسن ـ حتى محليا ماكتبانش بزاف فرمضان قليل ـ حينت ماكيناش أعمال جاهزة واش كيبقاو حتى كيعلنو فالأخبار باللي رمضان غدا عاد كيبداو يصورو زرب زرب الخدمة ديال كوكوت و قدم للمشاهد c normal تكون الحموضة و داكشي ماكملش واش نتا كتصور الحلقة فالصباح و كيتعرض فالعشية ـ فعلا للأسف هادشي ولا كاين بزاف نبقاو فالمغرب و بعض الاتهامات اللي كتوجه ليك على أنك متخلف سينمائيا ـ صراحة نفضل نكون متخلف سينمائيا على نقدم السينما الحالية فاجئني بدر بجوابو للحوار بقية
يتبـــــــع 
الجزء الخامس
صفحتنا علي الفايسبوك

About admin

شوف هاد الموضوع

قصص بعنوان مجانين الدارالبيضاء

  تحت الشتااء لي نازلا خيط من السما ولي كيقولواا جاياا وجايبا معاها الخير هادشي …

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *