الرئيسية / قصص غريبة / قصة بعنوان أحببت نجماً لامعاً ..الجزء السادس

قصة بعنوان أحببت نجماً لامعاً ..الجزء السادس

 

الواليدة ـ هاذي هي ربع ساعة ـ غير سمحيليا و صافي ـ وصلتي صاحبك ـ وصلتو ـ الله يرضي عليك ياوليدي كنت تاصلت بيك فالشركة على ود بغيتك تسول فالموعد ديال خوك قالوليا ماكينش ـ داكشي فاش بغيت نهضر معك ـ الله يسمعنا خبار الخير ـ عرفتي معامن تلاقيت البارح ـ معامن ـ با شفت الواليدة تغيرو فيها اللوان و بدات كتخاصم : شنو؟ ـ كيف سمعتي ـ و كيفاش حتى تلاقيتي بيه ـ عرفت يذوك الفيديوات اللي كيتنشرو جاني الخبار شكون كينشرهم و مشيت واجهتهم ـ باقي هو هو ماكفاهش أش دوز علينا دابا كينشر و كيتشهرعلى ظهرك ـ بغيت نتشاور معك ـ فاش ـ شفتو حالتو ماكتفرحش و عاد زيد عليه هذاك اللي كان خدام معاه أكيد غيكون تخلى عليه حينت مابقا عندو حتى شي فائدة ـ وحنا مالنا الجايحة ضربو هو اللي بغا ـ الواليدة راه كيبقى الأب ديالي و سيدي ربي وصانا على الواليدين ـ هذاك أب هذاك فين كان فاش خلاني بجوج دراري معاقين و تربية جايا فالطريق فين كان فاش ولدتك ومقدراش نجيب ليكوم ماتاكلو و غير المحسنين الله يجازيهوم بخير هوما اللي كيعطيوني فين كان منين كنتي كتسرق و كنتي غضيع كون ماسيفطش ليك الله اللي ينقذك فالوقت المناسب دابا عاد ولا أب حتى وليتي راجل وهاز راسك وهازنا معك بقيت حاضر راسي و ساكت كلامها معقول ولكن راه كبر و خانتو الصحة الشراب هلكو وماخلا فيه عظم واحد صحيح بقيت حاير وماعارف ماندير كيف ماكان الحال أنا ولدوما عندي منين نهرب من هاذ الحقيقة هو راه الأب ديالي بغيت و لا كرهت هزيت سيارتي و مشيت لأكدال بقيت متردد قبل مانطلع شحال و أنا كنخمم بان ليا أيمن جا جمع ليه حوايجو و رماه للزنقة صافي يا با العربي سالات مهمتك و أيمن جرا عليك شفتو كيشوف فالشانطة و ماعارف مايدير هبطت من السيارة هزيت الشانطة دار وشافني بقا مصدوم مهضرتش معاه دخلت الشنطة فالكوفر زعمة تبعني ركب السيارة وهو بقا ساكت اللي شافو يقول مسكين وصلت لواحد الشقة فكازا كنسكن فيها منين كتكون عندي شي خدمة فالأستوديو هو تابعني وساكت حطيت الشنطة فالبيت لقيتو كيتسناني فالصالة بقينا غير ساكتين مدة قطعت هاذ السكات : غتبقى ساكن هنا أنا غنشوف شي واحد يقابلك كل شهر غنخلي ليك شي بركة ديال الفلوس باش تعيش هادشي اللي كتسالني أما أنت مابغيت لا نعرفك و لا نشوفك بقى ساكت و لأول مرة نسمع صوتو : لا ولدي نتا ماكتسالي والو مادرتش فيك شي دين باش تردو ليا هادشي غير بوفوار منك أما أنا مانستاهلش ـ كون غير جيتي عندي بلا ماتبيعني للشمايت هاهو لاحك عقل عليك بقيت كنشوف فيه حاضر راسو و كيبكي : بلا دموع ماعندهم باش ينفعوك دابا اللي طرا طرا و البكا مور الميت خسارة فالأول بعتيني للدنيا خليتيني كنتلاوح فالزمان عرفتي كيفاش عشنا تحت الصباط اللي جا يمرمدنا أم و 3 أطفال 2 منهم معاقين و السليم كابر مشروع مجرم من الصغر و منين كبرت بعتيني لهضرة الناس الله يسمحليك هذا مانقوليك بقا غير ساكت و كيبكي نضت مشيت للباب حتى كيوقفني صوتو : طلعتي حسن مني و عاقل عليا أنا تخليت عليك ونتى وقفتي و فجنبي و ماخليتي حد يتشفا فيا أنا فرحان حينت ولدتك والد راجل سعدات الواليدة ديالك عرفات أش ربات بلا مانتردد مشيت نيشان لقبر معلمي و أبي الروحي الراجل اللي نقذني من الضياع الشخص اللي حماني و عاوني حتى وقفت على رجلي ماولدنيش بصح ولكن دار معايا اللي يدير الأب على قبل ولدو و كثر من بعد ماقرا عليه الفقيه سورة يس مديت ليه شي بركة وبقيت كنهضر معاه : اليوم تلاقيت وهضرت مع الأب ديالي الحقيقي الفرق بيناتكم كبيييير سبحان الله نتا ماولدتينيش ولكن درتي على قبلي اللي مايدار شكرا بزاف واخا مكونتش معك فأيامك الأخيرة سمحليا بزاف نادم ثيق بيا ماعمرني نسامح راسي يا أغلى و أروع شخص قابلتو فحياتي ركبت سيارتي ورجعت للدار كان يوم صعيييييب بزاف على نفسيتي والصدمات كتجي فدقة وحدة لقيت سعيد فرحان وناشط : بدر جابك الله ـ أش هاذ الأناقة ـ بارك ليا ـ علاياش ـ غنخطب إن شاء الله سعيد غيخطب حتى نيمار مشات درت ضحكة صفرا و درت راسي فرحان واخا أنا ربي اللي عالم بيا : الله يكمل كلشي بخير ـ أمين مشيت نتكى و كنتفكر أحداث هاذ اليوم فقت فالصياح ماعندي كانة ماعندي خاطر مشيت للتصوير أووف واش تقاداو الممثلات من الدنيا كاينة غير هاذ إخلاص بدينا كنصورو المشهد أول مرة يهرب ليا الإحساس ماحسيتش باللقطة بدات كتعاود وتعاود والو هرب ليا المشهد اعتاذرت من الجميع ماقدرتش نمثل المخرج تفهم الأمر بدا كيصور مشاهد أخرى و أنا خذيت اليوم عطلة مشيت Back Stage باش نبدل و نمشي بحالي حتى كتبعني إخلاص : بدر مالك ؟ ـ إخلاص ماقادرش نركز ـ شي مشكل نعاونك حسيت بيها صادقة أول مرة متصنعش ولكن ماحسيتش بذيك الرغبة أنني نشكي عليها همي و نعاود ليها بحال نيمار : لا بلا مانشغلش مشاكل عادية شدات ليا يدي : إلى حتاجيتي أي حاجة ماترددش طلب مني نعاونك غنكون فرحانة بزاف ـ الله يجازيك بخير عارفك نعمة الصديقة و الأخت و نعول عليك حسيت بيها بحال إلى تقلقات البنات مكتعجبهومش كلمة ختي أكيد دابا كتقول مع راسها الله يخوي ليك الجناب عارف ولكن قاسح حسن من كذاب ماكنحس من جيهتها بحتى حاجة بلا مانعطيها آمال على الخاوي مشات مقلقة و حسيت بيها بقا فيها الحال هاكا حسن مشيت نخرج بان ليا سعيد كيقلب عليا مكرهتوش يقلب عليا مشيت لسيارتي بغيت غير نعرف علاش أنا مفقوس اللي بغا يتزوج يتزوج أنا مالي ركبت الأوطو وتبعني : بغيت غير نعرف أش درت ليك واش مقصر فشي حاجة ـ مادرتي ليا والو ياسعيد ـ وعلاش ماحملش تشوفني ـ راسي ماحاملش نشوفو طالعة ليا القردة و غير قلب عليا الله يرحم باك ـ حشومة عليك حتى حتاجيتك و نتى تخوي بيا دابا شكون غيخطب معايا ـ واليديك مالي ولدتك ونسيتك زوينة هاذي ـ حشومة عليك ديما كتقوليا باللي منين نخطب تمشي معايا بقيت ساكت عندو الحق سعيد صاحبي و نيمار حتى هو صاحبي هههه لا نيمار عزيزة عليا الله يكمل عليهوم بخير : صافي درتي ليا محاضرة راه غنمشي معك غير ضحكنا ندمتينا شوية ماتبكي ـ ناري درتيها بيا والله حتى صحابلي بصح وراك ممثل نمبر وان بلاتي لاموغ كيتاصل : ألو رجاء وي شيغي غدا إن شاء الله هاحنا عندكم لا غنخطب بنت الجيران معلوم غنخطبك نتي ولكن بشرط قولي ديما وداد و لا ماجايش ألو رجاء ألو ههه الخط تقطع ـ الخط تقطع وقول وكان قطعات عليك خطيبتك سميتها رجاء ـ وي ياك قلتي عرفتيها ـ وي عرفتها من الأول ههههه الله لايوريك ياوليدي ياسعيد فين مشى عقلي شوية مانقتلك مي الحمد لله سعيد كيبغي رجاء وهو ودادي ناري باه يحيدو من الحالة المدنية ههه خاصو يعيط عليها غير بكنيتها ولا يبدل ليها سمية يسميها وجدان مثلا أوووف شحال فيها ـ وصافي يا ميار تكلمي للمديرة ـ أوك رجاء دعي معايا دخلت وخاطري مقبوضة لقيت المديرة مطلعة كرونها و كتسناني و مخرجة عينيها : سلام يا مدام ـ أش هادشي كاتبة ـ مقال ـ كشف الستار فيلم شركة سينما يتلقى دعم من الدولة و حنا مالنا ـ كيفاش مالنا راه فلوسنا هاذو خداو الملايير باش يصورو لينا الحموضة طلعو الفيلم بجوج ريالات و الباقي مشا لكروشهم ـ من إمتى و نتي مهتمة بهاذ الأخبار مالك وليتي هاكا سيري وعتابري راسك فعطلة مفتوحة بلا خلاص حتى ترجعي ميار القناصة اللي كتسيد الأخبار كيف كنعرفك خرجت من المكتب وخليتها مفقوسة ولكن لأول مرة نكون راضية على راسي وعارفة باللي هاذا هو الرأي الصحيح مشيت للدار رغم أنني حاسة بحال إلا فقدت عملي ماهتميتش عارفة باللي الرأي اللي درت 100% على صواب : ميار ـ نعم ياماما ـ نتي هنا ماخداماش اليوم ـ خذيت كونجي ـ علاش ؟؟ ـ بغيت نرتاح شوية ـ صافي مدام نتي غير فالدار خرجي تسخري ليا ـ مافيا اللي يخرج ـ ميار غتبقاي تيتي نيني هنايا خرجي تسخري لبست جلابتي وهابطة كنجر رجليا غادا فالشارع و كاعية و أنا متحلفة على كلشي : سمحيليا الأخت واحد الدقيقة ـ وناري مكتخليو حد فالتيقار ماتعرفو البنت من المزوجة واش معندكموش خواتات درت لقيتو بدر بقا كيضحك و أنا مصدومة : بدر ـ هههههه مالنا على هاذ الصداع وجه تحرش دخلت عليك بالله شكون غيتبسل عليك بقيت كنشوف فيه كان لابس بدلة رسمية و أنيق جا بوكوص كيف ديما : شفتك أنيق اليوم ـ و دابا شكون كيتحرش بالآخر يالمفرعنة بقيت كنخنزر فيه ضحك و كمل هضرتو : أنا ديما أنيق ـ لا اليوم مختالف ـ اليوم غنخطب إن شاء الله حسيت بحال إلا تخوا عليا سطل ديال الما بارد ضرباتني اللقوة و الساكتة و المسكوتة : ميار ـ الله يجعل كلشي مبارك و مسعود و هربت دغيا من ساحة المواجهة حينت كون زدت جزء من المئة كان غيشوف شلال الدموع اللي على وجهي بقيت غادا و كنتعكل بدر مادار حتى ردة فعل حدو بقا واقف دخلت للدار مشيت للبيت بكيت اللي ماعمري بكيت فحياتي ماما مسكينة تخلعات جات كتجري : ميار مالكي ـ لاوالو خلعني واحد الحمق فالزنقة ـ الخوافة بقا كتخافي مشات جابت ليا الما شربت و بقيت متكية و صورة ديال بدر بين عيني هبالو ضحكاتو نظراتو وقفتو كلشي فيه زوين رغم أننا قل من شهر باش تلاقينا قدر يغير حياتي ولكن للأسوء نعست بالبكا وفقت بالبكا فقت على صوت الزغاريت أش واقع شفت راسي فالمرايا ويلي على شوهة أش هاذ العينين كلهم منفوخين دخلات عندي رجاء كتوريني الخاتم من الباب : شوفي ـ شنو هادشي يارجاء ـ خاتم أنا تخطبت رجاء تزوجات ماقالتها ليا الغدارة و مع بدر ماشي حشومة عليها بقيت كنشوف فيها وهي غير كتشوف فخاتمها : معامن ـ ويلي ياميار حسستيني بحال إلى جيت حاملة و كتسولي على باه هه ناس كيقولو شكون هاذ سعيد الحظ وهو فعلا سعيد وهنا بديت كنقز بحال القردة : رجاء حلفي ربي ربي سعيد ـ ويلي حي ميار خرج ليك العقل شفتك فرحتي كثر مني ـ سعيد اللي خطبك ياك و بدر ـ بدر جا معاه راه صاحبو  الله على راحة بدر مشا غير يخطب مع سعيد و أنا فين مشى عقلي بديتك نوجد مع رجاء الخطوبة الرسمية فرحانة كثر منها هي ضمنات با سعيد أنا خاصني نطيح بدر فالشبكة وصل نهار الخطوبة مشيت مع رجاء للكوافورة هي دخلات تصاوب و أنا فرعت للكوافورة راسها : ختي أنا ديري فيا اللي بغيتي بلا ماتسوليني أشمن مكياج بغيت ولا أشمن نوع مكنفهمش فهادشي مهم نشوف راسي فالمرايا مانشوفش هاذ الفيكورة نشوف نانسي عجرم صافي شي بنت آية فالجمال بقات الكوافورة كتصاوب ليا وااو رجاء كيطلعات ماشاء الله كتحمق لا شي حاجة كثر من كتحمق : واو ماشاء الله تبارك الله كيطلعتي اليوم سعيد نغنيو عليه مشيتي فيها ـ ربي يخليك ياأروع صديقة فالوجود حتى نتي جيتي فنيونة فين مخبية هادشي يالعفريتة ـ مخبياه لوقتي ـ ناس ديال دواير الزمان بقينا كنضحكو وصلنا للدار دخلات رجاء للبيت وبقيت مع ماماها كنستقبلو الضياف لا أنا و لارجاء عندنا الخواتات داكشي علاش كنا كثر من الخواتات وصلو حباب العريس أنا عيني غير فمولاي السلطان ديالي دخل سلم عليا على زهر ماكاين لا انبهار لا والو بحال الأفلام فاش البطل كيشوف البطلة اللي ديما مكشترة و كيبقا حال فيها فمو داخل بلا كلمة بلا جوج وهاذ إخلاص مامحلها من الإعراب علاش جايبينها دخلات لالة العروسة رجاء دخلات شحال كوبل زوين هي وسعيد عيني غير على بدر إخلاص عاقت بيا ومشات حداه كتهضر معاه و ضحك وهو كيجاوبها و منساجمين و صافي بلا ماتفقسيني عرفتو ديالك صافي دازت الخطوبة زوينة أقل حاجة بعدا دازت زوينة للعرسان و الكوبلات بدر و إخلاص و رجاء سعيد أما البايرات بحالي فعطيهوم غير الشقا و تمارا بدات الخطوبة كتسالي وبقاو غير المقربين إخلاص حتى هي مشات بقيت فالكوزينة كنعونهم فالماعن حتى قالتليا خالتي نمشي نجلس مع الناس لقيت رجاء و سعيد جالسين كيهضرو مابغيتش ندير ليهوم الإزعاج طلعت للسطح بغيت نجيب مابقيتش عاقلة مع شفت بدر حتى هو جالس تما كلشي زوي فهاذ السيد إلا بلية الكارو : الله يعفو طفا الكارو وبقا كيضحك : بقات فيا هاذ البلية من واحد الفيلم سافا ـ الحمد لله ـ كيبقيتي آخر مرة شفتك ماعجباتنيش حالتك مابغيتوش يعيق بيا تصرفت بالزربة : ذاك النهار خاصمات عليا المديرة و خايفة نفقد عملي ـ يكون خير إلى فقدتي عملك أجي خدمي معانا فالسينما نتعاون معاك ـ نصلاح ـ بالتدريب و العمل تولي مزيان وإلى كانت عندك الموهبة تسهال القضية ـ أنا مافهمتش كيفاش كتصورو ذوك المشاهد الرومانسية وسط عباد الله ـ الاحتراف ـ كتجيني القضية صعييييييييييبة ـ هانتي أجي نديرو تجربة دابا أنا غنكون زميلك فالعمل و نتي معجبة بيا و سمعتيني خطبت فلحظة ضعف غتعتارفي بمشاعرك ـ اييه و علاش متكون شنتا اللي تعتارف ليا ـ أنا أصلا ممثل نتي اللي غنشوف واش عندك الموهبة بحال كاستينغ ـ صافي مشات أكشن ـ نيمار حنا أصدقاء و أنا مكنخبي عليك والو أنا خطبت قولي ليا مبروك وهنا تفكرت فاش قاليا غنخطب بقيت ساكتة وشوية جاتني حالة اكتئاب ذاك نهار : خطبتي بهاذ السهولة كتجي و كتقوليا خطبتي واش نتا عامي مكتشوفش ماعمرك حسيتي كلشي باين وواضح لو كنت كنبغي حجرة كون حسات بيا ماعمرك شفتي نظراتي ليك و شحال كنكون طايرة منين كنكون معك واش خاصني حتى نقولها ليك حتى نقوليك كنبغيك عاد تعيق خطبتي مبروك الله يكمل كلشي بخير ونتمنى ليك السعادة ماحسيتش براسي حتى دموعي بداو كينزلو أووف شحال دموعي ولاو ساهلين واو نيمار والله حتى راك واعرة تمثيلك صادق فواحد اللحظة صحابلي بصح جمعت البكية و جمعت راسي و ضحكت باركة من la chouihe : شفتي راني واعرة خاصك تخاف على بلاصتك ـ وبزاف هاد مشهد كان رائع ـ ديرني بطلة فيلمك الجاي ـ مالي حمق بغيتي ناس يديرو عزوف و صيام على السينما كثر من هاذ الصيام ـ ياك عجبك تمثيلي ـ الأمور كتختالف قدام الكاميرا ومشهد صغير بحال هذا مكيحكمش عليك واش تصلاحي تكوني ممثلة أو لا مشهد من الصباح و أنا نعبر و نخرج الكلمات من أعماق أعماقي و فالأخير مشهد واش هاذا كيديرها بلعاني ولا ساحرين ليه و لا مضبعينو هاذ إخلاص فقيهها من أي قنت و السيد عمى ويلي خاصني غندير بوق و نبرح و كنبغيه ا عباد الله ==> نيمار الرائعة ممثلة محترفة ياسلام فواحد اللحظة حسيت بهادشي حقيقي تأثرت سالات الخطوبة العقبة ليا بشي بنت الناس : ولدي بغيت نسولك ـ نعم يالواليدة ـ هذيك البنت اللي كانت لابسة قفطان فالباج شكون ؟ ـ صاحبتها سميتها ميار ههه أول مرة ننطق سميتها صحيحة وشنو نقول لواليدة نيمار ماجاتش : زوينة و ثقيلة ـ شفتك كتشكريها ـ عجباتني صراحة و نتا تبارك الله قريب توصل ل 30 عام و باقي ديال راسك ـ بغيتي تهربي ليا المعجبات ـ تبارك الله على الولد ـ غير كنضحك معك ـ ولدي فكر فهاذ الموضوع وفهاذ بنت الناس ـ كوني هانية ــ الهنى هو إلى فرحتيني وجمعت راسك ودرتي دارك ـ مالي دابا كنبان ليط دايع ـ لا تبارك الله والدة راجل ونصف كتشوف باك ـ لا كنسيفط ليه مصروفو وصافي ماقادرش نشوف فوجهو مشيت نعس و بقيت كنفكر فكلام الواليدة الحمد لله قادر نفتح دار و نستاقر نيمار كنرتاح ليها و حتى هي باينة كترتاح ليا وماشفت و ماسمعت عليها غير كل خير ولكن سميتها نيمار و حبي للريال فوق كل حب فالوجود دازت سيمانة عادي لا جديد و لا شي حاجة مهمة اللي نعاودو عليها تاصل بيا سعيد بغاني فشي حاجة طارئة مشيت : عيد ميلاد رجاء اليوم ـ لا سعيد لا إلا اليوم ـ هادشي اللي عطا الله وراه عرضات عليا أنا و نتا و صاحبتها عفاك يا بدر لا ماضحي معايا حتى أنا مفقوس بحالك ولكن القلب ـ نتا وقلبك و أنا مالي ـ بدر عفاك نفرحوها ـ موافق بشرط ـ آمر ==> سنة حلوة ياجميل أسكاس امباركي ـ الله يحفظك ياهاذ الشليحة راك معروضة لعشية غادي يجي سعيد وبدر ـ بصح اييه نجي علاش شحال عندي من رجاء مشيت لدار كنقلب على مانلبس واخا عارفة راسي واخا ماعرفت ماندير فحالتي بدر عمرو يديها فيا داكشي علاش ذوك الفلوس باش غنقاد ونصاوب الحالة دايزين فيا مشيت لواحد الصناك عركتها مزيان حتى عرفت أش درت ختكم كتفليبا على ماكلة ديال الزنقة وواخا كنصاوب سندويتشات فالدار ماشي بحال اللي كنشري العفن بنين رجعت للدار لقيت ماما كتبكي خلعاتني : ماما مالكي ـ إخلاص ياربي تكون ماتت و نتهنى منها ياسيدي ربي مرضاني فصحتها : مالها ـ مات اليطل وولات أرملة ـ هذاك فيلمها الحامض صافي 32568520 حلقة و فالأخر مات البطل الفيلم سميتو عاشقة محترفة كون جات عليا كون سماوه قاتلة محترفة طيحات 3 سيفطاتهوم كاملين للقبر خليونا من إخلاص ناري كنت غنتعطل على العيد ميلاد   رجاء ـ نعم ـ هذا هو العيد ميلاد ـ ماتفكرينيش راني مفقوسة أنا و رجاء جالسين ورجالة كيتفرجو فالكورة هذا هو العيد ميلاد الحمد لله باللي رزقي خسرتو على كرشي ماشي على كمارتي رجاء طلع ليها الطونسيون ل 20 تلفتات لسعيد اللي هو وبدر كانو كونسونطري فالكورة و حنا غير زايدين : سعيد ـ وي حبيبة ـ أش هاذ العيد ميلاد ـ الزين ديالي شنو ذنبي أنا إلى عيد ميلادك تلاقى مع الكلاسيكو مابغيت نضحي لا بعيد ميلادك ولا بحبيبتي البارصا ـ دابا البارصا هي شريكتي فيك ـ من بعد و نتناكرو دابا راني ناشط ياقدم الربح البارصا محيحة بدر جالس وطالع ليه الدم وخاصو غير معمان والله حتى مزيانة ليه غير أنا اللي نتفقس ماعنديش مع البارصا ماعنديش مع الكرة بصفة عامة ولكن عندي مع العكس كيعجبني : عندك الحق ياخويا سعيد البارصا طوب و كتلعب مزيان قولي شنو لابسين تلفتو كاملين كيشوفو فيا جاوبني سعيد : التوني المخطط بالحمر و الأزرق ـ مزيانين تبارك الله حيحو هذا هو اللعب وريالين شنو لابسين بدر طلع ليه الزعف و صافي كنحس بيه باغي ينتاحر والله هاذ البارصا دارت فيه اللي مقدرت نديرو : لابسين الغوز لابسين الموف فناظرك شغادي يكونو لابسين واش مكتفهميش الحاجة سكتينا و أجي نتا يا سي سعيد البارصا محيحة منين غير الحكم جا من جيهتهم وصافي باين الماتش مبيوع سعيد مبرد و بدر غير كيحنقز : نتوما غير تشوفو القضية حامضة قولي الحكام الماتش مبيوع و اللي عندو عندو بقيت أنا وسعيد كنشجعو البارصا و بدر و رجاء كيشجعو الريال صراحة عجبني الماتش لاالصراحة عجبني واحد الاعب فالريال ولكن مع ريالي مابينتش : وااو ماتش واعر كلشي كيلعب مزيان غير هاذ الاعب ماحملتوش مابغاش يتسرط ليا شوف كيداير شكون هذا بقاو حابسين الضحكة وواحد كيشوف فالآخر بدر واخا ريال خاسرة ضحك ويلي هاذو مالهوم : مالكم كضحكو تلفت ليا بدر : نيمار ـ نعم شنو بغيتي ـ ماشي نتي الاعب اللي ماحملتيش هو نيمار طلع ليا الضغط والسكر و جميع الأمراض نفسية : ويلي هذا هو نيمار بزاف عليك كتشبهني بيه أنا دايرة بحال هاكا ـ لا صراحة هو بوكوص عليك طلع ليا الدم و خرجت تبعاتني رجاء : الله يرحم ليك الواليدين عيد ميلادي هذا أنا مزاوكة بلا صداع ـ ماشفتيهش اصاحبتي شبهني بهاذاك ـ شكون بحالك راه غير سعيد جالس أما و الله حتى نيمار واعر ـ منين جاه كون غير شبهني بهذاك اللي لابس الأبيض و ناري شحال غزال ـ شكون كريستيانو ـ مكنعرفش السميات شحال رقم ديالو ـ 7 يا ميور 7 وداير حالة فالدريات كلشي يغوث يالغزال ـ لا هذاك جاتني فيه العياقة واخا صراحة بوكوص العفريت هذا اللي حمقني لابس 3 ـ أويلي واش بعقلك عجبك هذاك لا زين لاسمية ـ ولكن رجولة عرفتي أش كيدير للعصا ـ وجه العصا وجه تمارة أويلي على حمقة عجبك هذاك والله ماعندك الذوق ـ غير سي بدر اللي عندو الذوق دابا دخلت عليك بالله هاذ التبوكيصة كاملة تبارك الله ووليت نيمار ـ شفتي ديري الطانكة مايبقاوش يميزو بيناتكم ـ وزيدها بالطانكة الله يستر لعنة شيطان ودخلت غير على وجه صاحبتي وصافي كمل الماتش جبد سعيد واحد السنسلة و علقها فعنق رجاء و أنا بقيت كنشوف وحابسة البكية سعداتها أنا هاذ الحجرة كيعطيني الفقسة الدرك ماشي الكادوات برع غير ذيك باربي خلاتها رجاء مشاو بحالهوم وبقات رجاء كتحنقز : وااو شحال رومانسي ـ واييه و ذوق عندو ـ معلوم باقي الحال باتي معايا بلييز العجب أول مرة رجاء تعرض عليا مشينا لبيتها صاوبنا الفشار وبقينا مقسرين على Aashiqui بكثرة مارجاء تفرجات فالفيلم حفظاتو و حفظات أغانيه وبقات كتغني معاهم (جاينجي تو خو تجس هيهو جاينجي جيودا كيوتكي تم هيهو اب تم هيهو زندكي اب تم هيهو ـ حتى نتي حافظة ياليلى و كلشي حافظ ـ معلوم Aashiqui هذا رغم أن نهاية كانت حزينة ) بقات رجاء كتبكي : مال الزين ـ قصة زوينة بزاف ـ وعلاش كتبكي ـ كنتأثر النهاية مؤلمة دابا البطلة كانت كتبغي مغني وهو مدمن على الشراب وفالآخر مات قصة زوينة قتلو فيها البطل مكرهتش نعرف المؤلف نقوليه حرام عليك البكل كان مدمن مدمن قالت مدمن ناري حتى بدر مدمن على الكارو ناري قفرتها نهايتي غتكون بحالها : عطيني عفاك يا رجاء نمرة سعيد ـ نتي راه كنشك فيك نتي ـ عفاك مسألة حياة أو موت ==> سعيد تيليفون كيسوني ـ وي ماسمعتوش رجاء هاذي وي بغيتي بدر علاش بغيتيه أوك بدر ميار بغات تهضر معك ـ نيمار شنو بغات خذيت التيليفون علاش تاصلات بيا : ألو نيمار مبروك الفوز ـ بدر بغيت نهضر معك فشي حاجة مهمة ـ ياك لابس ـ عفاك يا بدر ماتبقاش تكمي لا ويوقع ليك بحال راهول ـ شكون راهول ؟ ـ بطل فيلم Aashiqui بقيت مصدوم هاذي مالها قطعات التيليفون و أنا باقي ساكت : هيهو أش قالت ليك ـ مافهمت والو ـ لغز ـ لا قالتلي متبقاش تكمي قلتلها علاش جتوبتني لا يوقع ليك ماوقع لراهول ففيلم Aashiqui ولا ماعرفت شنو سميتو بقى سعيد كيضحك : مالك ـ شفتي هاذ ميار والله حتى كتبغيك لا كتموت عليك ـ باش عرفتيها ـ سمع ياسيدي راهول كان مدمن كحول وهو فنان و مات فالأخير و ميار ممكن تكون خايفة لا تخليها بحال ففيلم Aashiqui بقيت كنضحك والله حتى هاذ نيمار حمقة : بدر شفتك كضحك ـ موقف مكيضحكش بانت ليك ذيك البنت عادية ـ ههه لا صراحة قوليا مكتحس والو من جيهتها ـ ماعرفتش شعور مختالف عمري حسيت بيه كنفرح و كنضحك من نيتي مكنحش بالوقت شي حاجة سبيسيال ـ وراه الحب هذاك وهو اللي حاجة سبيسيال زعمة نكون كنبغيها و مالها مشيت وبقيت كنفكر غير فنيمار خاصني نهضر معاها مانلقاش حسن منها تيليفوني بدا كيصوني هاذي الوكالة شنو بغاو : ألو وي ـ بدر سافا ـ سافا يا منتجنا الرائع ـ عفاك بغيتك دوز عندي غدا إن شاء الله من أجل مشروع فيلم جديد ـ أوك إن شاء الله فقت فالصباح من أجل العمل أول حاجة غندير نتاصل بنيمار بعدا نحدد معاها شي موعد نتافق معاها على حياتنا وي حياتنا كنبغيها و كتبغيني هاذي حاجة باينة ماكاين مانتسنى عطاتني رجاء نمرتها : ألو ـ وي شكون معايا ـ معك بدر حسيت بيها تفاجآت : بدر ـ هو هذا ـ شنو سبب المكالمة ـ الهضرة ماشي فالتيليفون ديري معايا شي بلاصة نهضرو فيها ـ واخا نتلاقاو حدا Lista Hey Essalam كتعرفها ـ لا نعتيها ليا ـ وتبع معايا النعت عرفتي العمالة ديال سلا حداها كاينة المحكمة الابتدائية وولاية الأمن كوميسارية ديال سلا كتزيد شوية كتلقى حبس الزاكي اللي حدا الغابة مهم عرفتي ليسطا جات حداهم وبالضبط حدا مؤسسة محمد السادس لإعادة إدماج السجناء ـ نيمار أش هاذ النعت نتي باغا تسيفطيني مالقاو حتا بلاصة فين يبنيو المعهد غير هاذي ـ و هادشي اللي عطا الله يوقع غير مشكل كلشي حداهوم من ديكلاري حتى نطق بالحكم وتنفيذ العقوبة السجنية و مابعد السجن و موقع هذا جا غير حدا الكوارث مشيت للوكالة دخلت عند المنتج : سلام ـ وعليكم السلام النجم ديالنا ـ شوقتيني نعرف المشروع جديد ـ مشروع غيكون مختالف على كل عمل طرحتي من قبل ـ كيعجبوني الأفكار جديد نقرا السيناريو عندك دابا ـ دابا نسيفطو ليك ولكن عندي الفكرة ـ علاش كيهضر ـ بنات الليل تصدمت لي أنني كنعرف باللي مشاهد هاذ النوع ديال الأفلام مشاهدها لاتصلح للجمهور الناشئ حس المنتج باللي ماراضيش على هاذ الموضوع : بدر مالك ـ لا غير حاس باللي ممكن المشاهد ماغتكونش نقية ـ ضروري راه كنكشفو واحد الواقع اللي خطير و كيفاش ممكن تصور فيلم بهاذ الحجم بلا مشاهد ـ كشف الواقع بغيت نسولك واش المغرب فيه غير الدعارة هذا هو المشكل الوحيد اللي فيه مافيه بطالة مافيه اختلاس مافيه ظلم مافيهش شي حوايج زوينين اللي بغى يكشف على شي واقع كيطيح فبالو سبحان الله غير الدعارة ـ أش هاذ الهضرة دابا ـ كيف كتسمع نتوما بلعاني كتختارو هاذ الموضوع حينت بكل بساطة فيه لقطات ساخنة وهدفكم من هادشي كامل غير الربح المادي ـ الفيلم كون ماكانش عندو قيمة ماكانش ياخذ دعم من الدولة وهادشي يبقى بيناتنا و حتى دابا جوج كلمات قبلتي الدور هو هذاك رفضتي وجودك غير مرحب بيه هنا ـ حسن نيت مايشرفنيش نخدم معكم ـ دخول الحمام بحال خروجه ماتنساش راك ساني عقد و فيه شرط جزائي فحين التراجع عليه ـ ولكن راك نتا الطرف اللي متخلي على العقد ـ علاش ياخويا سمعتي مني كلمة غنطردك بالعكس أنا متشبت بيك نتا و إخلاص وهاذ الفيلم مكنتخيلش لاعب فيه ممثل غيرك ـ كتحلم نمثل ليك فهاذ الفيلم شحال فهاذ الشرط الجزائي ـ 400 مليون سنتيم ـ شحال نتا نصاب أول نهار سنيت كانت غير 50 مليون ـ إوا عام على عام كتزاد 50 مليون فقيمة العقد حسبها 8 سنين و نتا خدام معانا كنظن باللي المبلغ هو هذاك ودابا ختار يا إما تمثل يا إما خلص و إلى ماعندكش بيناتنا المحاكم و كنحلف ليك بالله يا بدر إلا ماترجع كيف كنتي من قبل و كفس تحديتيني هانتا غتشوف لا ديالك شحال كتسوى ـ نتا كتعرف شي الله كون كنتي كتعرفو ماديرش هادشي
يتبع.. 
الجزء السابع و الاخير 
صفحتنا علي الفايسبوك

About admin

شوف هاد الموضوع

قصص بعنوان مجانين الدارالبيضاء

  تحت الشتااء لي نازلا خيط من السما ولي كيقولواا جاياا وجايبا معاها الخير هادشي …

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *