الثلاثاء , أكتوبر 27 2020
الرئيسية / بروتوكول الخاوي / الذكاء الإصطناعي أو Artificial intelligence

الذكاء الإصطناعي أو Artificial intelligence

 
العقل البشري شي حاجة مفشّكلة…و باش توصل بعقلك أن عقلك مفشّكل شي حاجة رائعة!
الموضوع د اليوم الذكاء الإصطناعي Artificial intelligence. شنو هوا هادشي لي غير من السّمية كايبان غادي يبدل شحال من حاجة فحياتنا ؟ ولاش كايصلاح ؟ و شنو هو جهدو ؟ و شناهوما الأمثلة د التطبيقات ديالو ؟

الذكاء الإصطناعي، هو الذكاء ديال الحواسيب و البرامج. هو فاش شي حاسوب يقدر يدير شي حاجة كاتشبه لداكشي لي يقدر يدير دماغك.
هادشي تاريخيا بدا فجوايه 1950 مع Alan Turing، الباحث الكبير لي بالاعمال ديالو فمجال التشفير هو و ناس أخرين، نقد حياة 14 مليون شخص فالحرب العالمية 2. هاد 14 مليون شخص كانت غادي تموت كون موقفاتش الحرب. لي بغا يعرف التفاصيل ديال هادشي، يشوف The Imitation Game لي هو فيلم رائع، لي كيشرح شنو دار هاد السيد للبشرية و شنو دارت ليه البشرية. Alan Turing حطّ واحد الامتحان لي فيها زوج د المشاركين، واحد فيهم آلة (حاسوب)، و الآخر شخص. واحد الحكم غادي يطرح أسئلة على المشاركين بزوج، و إيلا مقدرش يعرف شكون الحاسوب و شكون الانسان، فإن الحاسوب ربح هاد الامتحان !
من هنايا كايبان الهدف ديال AI، لي هو محاكاة اشياء لي العقل الإنساني كايديرها. ولكن لي خاصكوم تعرفو، هو أن هادشي ماشي ساهل بتاتا. ناخدو مثال. نفتارضو أنني بغيت نكتب لكم : ’Hello World’ ولكن حيث كنت كنكتب بالزربة، غلطت و كتبت .’Hello workd’ هادا خطأ بسيط لي العقل البشري ذغيا يعيق بيه، و ذغيا يصحو. كلنا عارفين بلي ‘L’ حدا ‘K’ فلوحة المفاتيح، و كولشي غايفهم بلي راه صبعي ضغط على الحرف الخطأ لي حدا الحرف لي بغيت نضغط عليه.

دابا نفترضو آن شي حاسوب بغا يفهم ’Hello workd’. أول حاجة، خاص تكون فراسو بلي راه تقد تكون غالطة. يعني خاص هاد الحاسوب تكون فيه خوارزمية، فيها فشي بلاصة : آي نص جاك خاصك تآكد بلي صحيح. و باش غادي يتآكد بلي صحيح ؟ ببساطة بخوارزميات وحدة أخرى !
نحولو نبسطو خوارزمية غادي تصحّح هاد الجملة. أول حاجة غادي ديرها، هي غادي تقرا النص. من بعد غادي تقسمو لكلمات. و من بعد غادي تاخد كل كلمة و غادي تشوف واش كاينة فالقاموس د اللغة الإنجليزية. وباش تشوف واش كاينة فالقاموس، كاينين بزاف ديال الطرق. مثالا، تهز داك القاموس تفليه كلمة كلمة، و كل مرة تقارن الكلمة ديال القاموس بالكلمة ديالنا، حتا تلقاها (غير للإشارة، القاموس د اللغة الإنجليزية فيها كثر من مليون كلمة) . كاينة طريقة أخرى، هي بحال الطريقة لي كنقلبو بيها فالقاموس، هيا ناخدو الحرف الآول، و من بعد الثاني … هاد الطريقة أكثر تعقيدا فالخوارزمية ديالها ولكن أكثر فعالية.
واخا، دابا نفتارضو الحاسوب لقا الكلمة الأولى فالقاموس و عرفها (غير عرفها، راه بهادشي لي درنا هو مزال ما فاهمها). من بعد غادي يدوز للكلمة الثانية، غادي يدير نفس الحاجة، ولكن هاد المرة ماغديش يلقاها، حيت هي أصلا ماكيناش فالقاموس. هنايا غادي يعرف بلي فيها خطأ و غادي يحاول يصحّو. طرق التصحيح، كاينين بزاف. غادي نعرض وحدة منهوم كتعتامد على واحد اللعيبة سميتها Levenshtein distance. هاد المسافة ديال Levenshtein كاتحسب مابين زوج ديال الكلمات باش تعبر لينا القرب ديالهوم من بعضياتهم. كيفاش كنحسبوها ؟ ب الاعتماد على 3 د الحوايج :
– كانحسبو شحال من حرف تغيّر مابين 2 د الكلمات، مثلا مابين examan و examen تبدّل حرف واحد.
– كانحسبو شحال من حرف تزاد من كلمة لأخرى، مثلا set و seet تزاد حرف واحد.
– كانحسبو شحال من حرف ناقص باش نوصلو للكلمة لي كانقارنو معاها. مثلا، fight و fiht ناقص حرف واحد.

بيما آن الكلمة ديال ’ workd’، الخوارزمية مالقاتهاش فالقاموس، إذن هي غادي تاخد جميع الكلمات لي قراب ليها و غادي تحسب المسافة ديالها بهاد الكلمة، و من بعد غادي تاخد الكلمة لي عندها اصغر مسافة ب ’ workd’، و غادي تقول راه وااااقيلة هادشي ليا بغا لي كتب أو لي كتبات تقول. و باش يزيد يتأكد يقد يدير حوايج أخرين، مثلا ياخد الجملة كاملة و يشوف شنو جا فالمعنى… هادشي كولو غير باش يلقى شي حاجة لي الشخص لي كايكون كايقرا يقد گاع ماتبان لو غلط و عقلو يصّحها تلقائيا و يدوز. قلت ليكوم العقل شي حاجة واااعرة…
دابا، فاش اتشوفو شي حاجة جديدة دارتها شي شركة فهاد المجال د الداكا الاصطناعي… تخيلو شحال د الخوارزميات موراها… راه السخط د السطورا د Code باش يدير شي حاجة كنديروها يمكن بلا مانشعرو. المهم تهلاو فعقلكوم، و ماضيعوهش فلي ماغيصلاح لوالو !

About admin

شوف هاد الموضوع

الغنى لا ينتج المجد

 السلام عليكم و رحمة الله “الغنى لا ينتج المجد،بل الإرادة والعمل من تخط بأحرف من …

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *